(London) 21 Feb 2022. Tababare Thomas Tuchel ayaa kooxdiisa Chelsea weydiistay inay usoo gacan geliyaan xiddiga kooxda kubadda cagta Paris Saint-Germain khadka dhexe uga ciyaara ee Marco Verratti.
Sida laga soo xigtay warsidaha Fichajes, macallinka Jarmalka ah ayaa doonaya inuu khadkiisa dhexe kusoo daro xiddigo cusub si uu u xoojiyo maadaama hannaan ciyaareedkiisa uu xoogga ku saaro kubbad heynta iyo shaqada khadka dhexe, waxaana uu haatan doonayaa inay Blues u dhaqaaqdo soo xero gelinta Verratti.
Warsidaha ayaa intaas ku daray in durba Tuchel uu maamulka naadiga Chelsea kala hadlay inay gacanta usoo geliso raace-dhisaha Taliyaaniga ah kaasoo qandaraaskiisa Parc des Princess uu dhici doono xagaaga 2024.
Si kastaba ha ahaatee, PSG ayaa la aaminsan yahay inaysan haatan diyaar u ahayn iibinta xiddigii hore ee naadiga Pescara ee dalka Taliyaaniga, kaasoo ay lasoo saxiixatay xagaagii 2012, halka kooxda heysata horyaalnimada Yurub la fahansan yahay inay xiddigan u qorsheyneyso keliya 50 milyan illaa 60 milyan oo euro.
Gool FM.