(Paris) 03 Maarso 2022. Kooxda kubadda cagta ayaanan marka ku fikirin inay macallinkeeda Mauricio Pochettino ku baddesho Zinedine Zidane ama macallin kale sida uu sheegay agaasimaheeda ciyaaraha ee Leonardo.
Pochettino ayaa si aad ah loola xiriiriyay muddooyinkii dambe inuu xilka macallinimo ee naadiga Manchester United ka baddelo hoggaamiyaha sida ku meel gaarka ah u haya ee Ralf Rangnick, waxaana intaas kaddib saxaafadda Faransiiska ay qortay inay PSG dooneyso inay booska macallinka reer Argentina ku baddesho Zidane.
Balse Leonardo oo la hadlay majaladda L’Equipe ayaa dafiray dhammaan arrimahaas isagoo gaashaanka u daruuray inay kooxdiisa dooneysay inay macallinkii hore ee Real Madrid la xiriirtay si ay ugu baddesho Pochettino.
“Maanta hal sano sano ayaa uga harsan qandaraaskiisa, run ahaantiina, maranaba kama aynu fikirin inaan macallimiin isku baddelno xaqiiqdii” ayuu yiri Leonardo.
“Marnaba ma aynu la xiriirin Zidane ama qof kale, kahor intuusan halkan imaanin, Pochettino waxaa uu ka mid ahaa shanta macallin ee ugu fiican, walina waa ka mid yahay, waxaadna ka arki kartaa horumarka inkastoo ay wax badan dhaceen” ayuu 52-sano jirka reer Brazil hadalkiisa kusii daray.
Si kastaba ha ahaatee, mustaqbalka Pochettino ayaanan wali hubanti ahayn, waxaana lala xiriirinayaa Man United iyo kooxda Real Madrid oo dhawaan kusoo biirtay doonistiisa.
Gool FM.