(Madrid) 23 Abriil 2022. Kooxda kubadda cagta Real Madrid ayaa lasoo warinayaa inay iska diidday mushaharka uu ka dalbanayo bartilmaameedkeeda koowaad ee Kylian Mbappe kaasoo ay si bilaash ah xagaagan kaga soo qaadan karto kooxda Paris Saint-Germain.
Qandaraaska 23-sano jirkan uu kula jiro naadiga PSG ayaa dhici doono dhammaadka xilli ciyaareedkan iyadoo si aad ah loola xiriirinayo u dhaqaaqista garoonka Santiago Bernabeu maadaama uu yahay bartilmaameedka koowaad ee naadiga Los Blancos.
Si kastaba ha ahaatee, suxufiga ka faallooda arrimaha suuqa kala iibsiga ee Guillem Balague ayaa sheegay inay Real Madrid iska diidday dalabaadkii u dambeeyay ee uu la yimid weeraryahanka Faransiiska kaasoo doonaya inuu mushaharaad caqliga ka weyn uu ka qaato caasimadda Spain.
Suxufiga reer Spain ayaa sheegay in Mbappe iyo wakiilladii ay dalbadeen in 100 milyan oo euro lagu kordhiyo mushahar la sheegay inay hore ugu heshiiyeen, hase ahaatee, inkastoo uusan wali jirin heshiis rasmi ah oo u dhexeeya labada dhinac, haddana kooxda hoggaamineysa horyaalka La Liga ayaa ku kalsoon inay laacibkan heshiiskiisa gacanta kusoo dhigi doonto xagaagan.
Gool FM.