(Turin) 23 Abriil 2022. Halyeyga Juventus ee Alessandro Del Piero ayaa laacibka kooxda haatan u ciyaara ee Paulo Dybala uga digay inuu ku biiro kooxaha ka ciyaara horyaalka Premier League sida Tottenham Hotspur iyo Arsenal, waxaana uu tusaale ugu soo qaatay Lionel Messi oo ay Dybala isku dal kasoo jeedaan.
Dybala ayaa qarka u saaran inuu ka hayaamo Juve dhammaadka xilli ciyaareedkan kaddib dhammaadka qandaraaskiisa, waxaana si aad ah loola xiriirinayaa u dhaqaaqista Spurs sida uu qoray wargeyska Corriere dello Sport.
Yeelkeede, Del Piero oo weerarka ugu ciyaari jiray Bianconeri iyo xulka qaranka Taliyaaniga ayaa tilmaamay in kubadda horyaalka Ingiriiska ay ku dhisan tahay awood dhanka jirka ah, sidaas darteedna aysan weeraryahanka reer Argentina u wanaagsaneyn inuu halkaas u wareego.
“Horyaal sida midka Spain oo kale ah ayaa u wanaagsan, horyaallada awoodda jirka ku dhisan sida France iyo England, waan u maleynayay Messi inuu dhibtoonayo marka uu u dhaqaaqayay horyaal awoodda jirka ku dhisan, sidaas darteed, Spain iyo Italy ayuu Dybala shaqo wanaagsan ka qaban karaa” ayuu yiri 47-sano jirka 705-ta kulan u saftay Juventus isagoo la hadlayay Sky Italia.
Si kastaba ha ahaatee, 28-sano jirkan ayaa 33 kulan u saftay The Old Lady tartammada oo dhan xilli mciyaareedkan isagoo u dhaliyay 13 gool halka uu caawin ka geystay lix kale.
Gool FM.