RASMI: Paris Saint-Germain iyo Bayern Munich oo ku kala guuleystay horyaalladooda Ligue 1 iyo Bundesliga

(Yurub) 24 Abriil 2022. Kooxda kubadda cagta Paris Saint-Germain ayaa ku guuleysatay horyaalka dalka Faransiiska ee Ligue 1 kaddib barbarro 1-1 ah oo ay xalay garoonkeeda kula gashay naadiga Lens.

PSG ayaa dhibicdan u baahneyd si ay markii 10-aad ugu guuleysato horyaalka Faransiiska iyadoo haatan soo barbarreysay kooxda Saint-Etienne oo ahayd naadiga tirada ugu badan ku guuleysatay horyaalkan.

Lionel Messi ayaa ciyaartii xalay hoggaanka u dhiibay Paris kahor inta uusan Lens goolka barbarraha u dhalin Corentin Jean.

Dhinaca kale, kooxda Bayern Munich ayaa ku guuleysatay horyaalka dalka Jarmalka ee Bundesliga kaddib markii ay 3-1 ku garaacday kooxdii kusoo xigtay ee Borussia Dortmund.

Bayern ayaa xaqiijisay inay ku guuleysatay horyaalka Germany markii 10-aad oo xiriir ah iyo markeedii 32-aad guud ahaan maadaama guushii xalay gaarsiisay farqi 12 dhibcood ah inay hoggaanka ku qabato iyadoo ay u harsan yihiin kaliya saddex kulan.

Gool FM.