(Madrid) 27 Maajo 2022. Halyeeyga Real Madrid ee Iker Casillas ayaa farriin u diray xiddigaha Los Blancos kahor inta aysan ku wajihin Liverpool finalka Champions League.
Labada kooxood ayaa habeen dambe ee sabtida ah ku kulmi doona garoonka Stade de France ee ku yaala magaalada Saint-Denis, caasimada dalka France ee Paris, iyada oo lagu go’aamin doono kooxda xilli ciyaareedkan loo caleema saari doono koobka tartanka ugu muhiimsan Yurub ee heer kooxeed.
Haddaba wargeyska Marca ee dalka Spain ayaa shaaca ka qaaday farriinta uu Iker Casillas u diray xiddigaha Real Madrid kahor finalka Champions League, wuxuuna yiri:
“Taageerayaasha Real Madrid waa inay ku faanaan kooxdan, taasoo soo bandhigtay qaab ciyaareed heer sare ah oo qof walba uu ku riyaaqay.”
“Ciyaaryahanka Real Madrid ahaan, waa in aad haysataa awoodan, xirfadan, iyo waxa ugu muhiimsan geesinimadan kaa dhigaysa ee ah inaad gaarto finalka, tanina waa waxa farqi ka sameynaya tartanka sida Champions League ah.”
“Soo noqoshada ama (remontada) aad bay u wanaagsan tahay, laakiin hadda waa inaan ku guuleysanaa taratanka.”
“Haddii aynaan ku guuleysan koobka, qofna ma xasuusan doono wixii ku dhacay Paris Saint-Germain, Chelsea iyo Manchester City, si ay u sii wadaan saameeynta sheekada, dhamaadka waa in lagu qurxiyaa koobka.”
“Real Madrid iyo Liverpool waa labada kooxood ee ugu fiican adduunka wakhti xaadirkan, labada kooxoodba way u qalmaan in ay finalka soo gaadhaan.”
Gool FM.