(London) 15 Juun 2022. Chelsea ayaa dooneysa inay xoojiso daafaceeda si ay isugu diyaariso caqabadaha xilli ciyaareedka cusub, gaar ahaan inay hesho badelka Antonio Rüdiger oo ku biiray Real Madrid.
Warbixin uu daabacay wargeyska The Sun ee ka soo baxa Ingiriiska ayaa lagu sheegay in Chelsea ay qorsheyneyso inay la soo saxiixato daafaca da’da yar ee reer Holland iyo kooxda Juventus ee Matthijs de Ligt.
Wararka ayaa tilmaamaya in shaqada Blues u taala ee ah la soo saxiixashada Matthijs de Ligt aysan noqon doonin mid sahlan, maadaama ay jiraan sidoo kale 6 kooxood waaweyn oo Yurub ah oo soo bandhigay xiisaha ay u qabaan adeegiisa.
Kooxaha xiiseynaya adeega daafaca da’da yar ee reer Holland iyo kooxda Juventus ee Matthijs de Ligt ayaa kala ah Manchester City, Liverpool iyo Manchester United oo England ah, iyo sidoo kale labada labada naadi ugu weyn horyaalka La Liga ee Real Madrid iyo Barcelona, lagu daray kooxda Faransiiska ka dhisan ee Paris Saint- Germain.
De Ligt oo 22 jir ah, ayaa Juventus kula jira heshiis dhacaya 2024, waxaana uu Bianconeri uga soo wareegay Ajax Amsterdam sanadkii 2019.
Daafaca reer Holland ayaa tan iyo markii uu yimid Juventus wuxuu u ciyaaray 117 kulan oo tartamada oo dhan ah, waxa uu u dhaliyay 8 gool, sidoo kale wuxuu caawiyay 3 gool.
Gool FM.