(Doha) 15 Dis 2022. Daafaca garabka bidix xulka qaranka France ee Theo Hernández ayaa farriin adag u diray kabtanka xulka qaranka Argentina ee Lionel Messi, kahor inta aysan isku wajihin labada xul finalka Koobka Adduunka 2022.
Xulka qaranka France ayaa guul qaali ah ka gaaray dhigooda Morocco, kaddib markii ay kaga adkaadeen 2-0 ciyaartii semi-finalka ahayd ee Koobka Adduunka.
Hernandez oo ciyaarta kaddib la hadlay warbaahinta ayaa yiri:
“Kama cabsaneyno inaan wajahno Lionel Messi iyo xulka Argentina, maadaama ay yihiin koox xoogan, laakiin sidoo kale waxaan heysanaa koox tayo leh.”
“Waa wax cajiib ah in la ciyaaro laba final oo koobka adduunka oo xiriir ah. Waxaan soo bandhigi doonaa wax walba oo aan kaga guuleysan karno Argentina.”
Wuxuu carabka ku adkeeyay in xulka France uu soo bandhigi doono wax walba oo uu awoodo kulanka ugu dambeeya si uu mar labaad oo xiriir ah u qaado Koobka Adduunka.
Gool FM.