(Paris) 13 Abriil 2016 Daafaca reer Holland ee PSG Gregory Van der Wiel ayaa banaanka soo dhigay inuusan ku faraxsanayn sii joogitaanka kooxda ka dhisan caasimada faransiiska.
Gregory Van der Wiel ayaa sheegay inaysan dhibaato kala dhexeyn tababare Blanc balse uu doonayo inuu ciyaaro hadii kalena uu ka tagi doono PSG.
“Hal isbuuc gudihiis ayaan marna fadhiyay taraboonka garoonka markalena aan ka qayb qaatay kulan ka tirsan rubuc dhamaadka Champions League” ayuu yiri Gregory Van der Wiel oo ka hadlay mustaqbalkiisa.
“Kuma faraxsani halkaan, ma doonayo inaan sii joogo, laakiin waan arki doonaa wixii dhaca, ma jirto dhibaato shaqsi ah oo igala dhexeysa Balnc”.
“Kaliya waxaan doonayaa inaan ciyaaro, waan ogahay in tababaruhu uu leeyahay go’aanka kama danbaysta ah, marna waa uu i ciyaarsiinayaa marka kalena maya, taasna ma ahan wax ii wanaagsan”.
Gool FM