(PSG) 19 Luulyo 2018. Paris St Germain ayaa kaga hogaamineysa Manchester United tartanka loogu jiro daafaca Milan Leonardo Bonucci, sida ay ku waramayaan saxaafada dalka Talyaaniga.
Sida laga soo xigtay wargeyska “La Gazzetta dello Sport” Leonardo Bonucci ayaa ka tagi doona AC Milan kaliya hal sanno ka dib markii uu kaga soo wareegay Juventus aduun dhan 40 milyan oo euros.
Alessandro Luci oo ah wakiilka Leonardo Bonucci ayaa wuxuu haatan ku sugan yahay gudaha magaalada Paris si uu heshiis ula gaaro Paris Saint-Germain.
Sidoo kale Jose Mourinho ayaa lagu soo waramayaa inuu dareen xoogan u qabo saxiixa Leonardo Bonucci si uu ugu xoojiyo daafaca Manchester United xilli ciyaareedka soo aadan, islamarkaana uu iska ilaaliyo qaladaadka sanadkii hore.
AC Milan ayaa heysata dhibaatooyin dhanka dhaqaalaha, halka kooxda Rossoneri ay go’aansatay inay iska iibiso Leonardo Bonocci si ay uga takhalusaan mushaharkiisa sanadlaha ah ee gaarsiisan 10 milyan oo euros.
Gool FM.