(Paris) 20 Maarso 2018 Kooxda lacagta badan ee PSG ayaa doonaysa inay u dhigto Real Madrid dabin la mid ah kii ay Neymar uga qaadatay xaggaagii Barcelona.
Barnaamijka El Chiringuito ayaa lagu sheegay in PSG ay qasnadeeda u furayso tababare Zinedine Zidane si ay ugu qanciso inuu layliyo kooxda xiliciyaareedka dambe maadaama ay iska fasaxayso Unai Emery.
Milkiilaha PSG ee Nasser Al-Khelaifi ayaa diyaar u ah in tababare Zidane uu ka dhigo tababaraha ugu mushaarka badan adduunka haddii uu aqbalo dalabkiisa.
Tababare Zidane wali wax go’aan ah kama gaarin mustaqbalkiisa Real Madrid, bilowgii xiliciyaareed kaan ayaana dhawr jeer la galiyay mugdi inuu sii joogayo kooxda.
Haddii tababare Zidane uu ku guulaysto Champions League xiliciyaareed kaan waxay u badan tahay inuu sii ahaado tababaraha Real Madrid laakiin calaamad su’aal ayaa fuuli doonta haddii laga soo reebo kooxda koobka horyaalada yurub.
Sida lagu sheegay El Chiringuito, Real Madrid ayaa u dhaqaaqaysa Jose Mourinho ama Jorgen Klopp midkood haddii ay iska fasaxdo tababare Zidane.
Gool FM